Этнополитикая но правоя секциен кивалтӥзы история наукаосъя доктор, профессор Карл Пономарёв но Кун Кенешысь депутат Татьяна Ишматова. Люкаськемъёс нырысь ик «Удмурт кенеш» ассоциацилэн ӧтчамезлэн статусэз сярысь закон пумысен вераськизы. Та законлэн проектэз, пе, дась ини, сое эскерон вылысь Кун Кенеше сётоно.
Трос вераськон мынӥз егит кивалтӥсьёсты будэтон сярысь. Кылдытоно, пе, удмурт кадръёсты дасянъя нимысьтыз программа. Вуоно кивалтӥсьёсты будэтоно егитысен ик. Дасяно тужгес визьмо, быгатӥсь, азьлань вамышъяны дась луись удмуртъёслэн нимтулъёсынызы база. Марысь мар ке, специалистъёсты утчаса, бызьылоно медаз луы.
Кун Кенешысь депутат Татьяна Ишматова тодэ вайытӥз: «Шунды» огазеяськон кӧня ке аръёс ӵоже ни ужа егит азьветлӥсьёсты будэтон бордын. Та дырлы «Шундылэн» базаяз 1 сюрслэсь трос сыӵе егитъёс пыртэмын. (далее…)